А.Әуелбек
Қызылорда облысының қылмыстық істер жөніндегі мамандандырылған ауданаралық сотының бас маман сот отырысының хатшысы
Қазіргі таңда сот жүйесінде ақпараттық технологияларды енгізу – әділдік пен ашықтықты қамтамасыз етудің маңызды тетігі. Соның айқын дәлелі – сот отырыстарында аудио және бейне жазбаның міндетті түрде қолданылуы.
Аудио-бейне жазба – сот процесінің барысын толық тіркейтін техникалық құрал. Ол сотта айтылған әрбір сөздің, берілген түсініктемелер мен дәлелдердің нақты жазбасын сақтауға мүмкіндік береді. Бұл шара сот ісін жүргізудің ашықтығын, айқындығын және объективтілігін арттырады.
Қазақстан Республикасының Қылмыстық-процестік және Азаматтық-процестік кодекстеріне сәйкес, сот отырыстары аудио немесе бейне жазу арқылы тіркелуі міндетті. Тек мемлекеттік құпияларды, кәмелетке толмағандарды немесе жеке өмірге қатысты істерді қарау кезінде жазба шектеулі түрде жүргізіледі.
Аудио-бейне жазбалар кейін сот шешіміне шағымдану кезінде дәлелдеме ретінде пайдаланылуы мүмкін. Бұл судьяның, прокурордың және тараптардың әрекеттерін нақты көрсету арқылы заңдылықтың сақталуын қамтамасыз етеді.
Сонымен қатар, мұндай жазбалар сот қызметінің сапасын арттырып, азаматтардың сот билігіне деген сенімін күшейтеді.
Қорытындылай келе, сот отырыстарында аудио-бейне жазбаның қолданылуы – сот төрелігін жүзеге асыруда ашықтық пен әділдікті қамтамасыз ететін маңызды құқықтық жаңалық. Ол заманауи технологияларды пайдалану арқылы әділ сот төрелігін жаңа деңгейге көтерді.
