Соңғы жылдары халықаралық терроризм ауқымы, келтірілген залалдары мен жиілігі бойынша адамзаттың ең өзекті мәселесіне айналып отыр. Оның ішінде діни экстремизмнің орны бөлек. Діни экстремизм көп жағдайда саясатпен бірігіп, қоғамды тұрақсыздандыруға бағытталған және ұлттық қауіпсіздікке қатер төндіретін құрал. Экстремизм және терроризммен күрес біздің күн тәртібіндегі өзекті мәселелердің бірі.
Осы орайда Сыр еліндегі Ұлттық ұланның 5547 әскери бөлімінде жеке құрамның өзге діни ағымдарға еріп кетпеуі, терроризм мен экстремизмнің құрбаны болудың алдын алу мақсатында кездесу өткізілді.
Жиынға Қызылорда облысының Дін істер басқармасының «Дін мәселелерін зерттеу орталығы» КММ-нің аға маманы-теолог Бақтияр Оспан, Қызылорда облыстық полиция департаменті экстремизмге қарсы іс-қимыл басқармасының аға жедел уәкілі полиция майоры Амангелді Құлахметов және 5547 әскери бөлімінің әскери полиция бөлімшесінің бастығы подполковник Қайтар Иманқұлов қатысты.
Теолог Бақтияр Есенгелдіұлы зайырлы мемлекет, діни экстремизм мен терроризм ұғымдары, деструктивті діни ағымдардың және ғаламтор желісі арқылы діни білім алудың қауіптілігі, сондай-ақ Қазақстан Республикасының аумағында сот шешімі бойынша тыйым салынған экстремистік, террористік ұйымдар туралы кеңінен ақпарат берді. Сонымен қатар жат ағымдардың жетегінде жүрген азаматтардың қоғамға қауіп тудыратын тұстарына тоқталып өтті.
Полиция майор Амангельді Изатуллаұлы мен подполковник Қайтар Иманқұлов жеке құраммен әңгімелесу барысында діни экстремизм мен терроризмге қарсы іс-қимыл нысандарын, әлеуметтік желілерде діни экстремизмнің алдын алу әдістерін тілге тиек етіп, құқықтық сауаттылыққа ерекше назар аударды. Сондай-ақ жеке құрамға экстремистік бағыттағы құқық бұзушылық жасағаны үшін жауапкершілік бары түсіндірілді.
Кездесу соңында жат ағымның жетегіне еріп, оның құрбанына айналған жандар туралы бейнероликтер көрсетілді. Жеке құрамның сұрақтарына жан-жақты қамтылған, мысалдар келтіре отырып тұшымды жауаптар берілді.
Бұл қатерлі дерттің алдын алудың маңызы күн санап артып келеді. Өйткені мемлекеттің тұтастығына, қоғамның бірлігіне қатер төндіретін жаһандық құбылыспен күрес ортақ мәселе.
Қазақстан Республикасы Ұлттық ұланы
«Оңтүстік» өңірлік қолбасшылығының
баспасөз қызметі
